ភ្នំពេញ៖ ផ្ទះពលរដ្ឋនៅខេត្តព្រះវិហារចំនួន ៥០៣ខ្នង ស្មើនឹង ២១៤៤គ្រួសារ ដំណាំស្រូវជាង ៣ពាន់ហិកតា រងផលប៉ះពាល់ដោយសារជំនន់ទឹកភ្លៀង ក្នុងនោះដំណាំស្រូវខូចខាតចំនួនជិត ៥០០ហិកតា។ នេះបើតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយដែលទទួលបានពីលោក សុទ្ធ គឹមកុលមុនី អ្នកនាំពាក្យ។

គិតត្រឹមថ្ងៃទី០៦ ខែតុលា ឆ្នាំ២០២២ កម្ពស់ទឹកស្ទឹងសែន នៅចំណុចសំណង់ទំនប់អាងទឹករក្សាទុកឡើង ៤៦,៩២ម៉ែត្រ។

អ្នកនាំពាក្យគណៈកម្មាធិការគ្រប់គ្រងគ្រោះមហន្តរាយបានបញ្ជាក់ថា ទឹកជំនន់នៅខេត្តព្រះវិហារបានធ្វើឲ្យប៉ះពាល់ដល់ ៨ក្រុង-ស្រុក ស្មើនឹង ២០ឃុំ-សង្កាត់ ប៉ះពាល់ពលរដ្ឋចំនួន ២១៤៤គ្រួសារ ជម្លៀស ១១០គ្រួសារ ប៉ះពាល់ផ្ទះ៥០៣ខ្នង ខូចខាត ៦ខ្នង ស្រូវចំនួន ៣៤៩០ហិកតា ក្នុងនោះខូចខាតស្រូវចំនួន ៤៩៩ហិកតា ប៉ះពាល់ផ្លូវជនបទចំនួន ១៣,០៦០ម៉ែត្រ។

បើតាមអ្នកនាំពាក្យ ផលប៉ះពាល់ក្នុងខេត្តព្រះវិហារនេះ គឺចាប់ផ្តើមតាំងពីខែឧសភា ដល់ដើមខែតុលានេះ។

សូមបញ្ជាក់ថា នៅថ្ងៃទី០៥ ខែតុលា ឆ្នាំ២០២២ លោក គីម រិទ្ធី អភិបាលខេត្តព្រះវិហារ និងមន្ត្រីពាក់ព័ន្ធបានចុះមកត្រួតពិនិត្យនៅតំបន់ដែលរងប៉ះពាល់ដោយទឹកជំនន់ និងបានពាំនាំអំណោយរបស់រាជរដ្ឋាភិបាលជូនពលរដ្ឋដែលរងគ្រោះ។ អំណោយដែលផ្តល់ឲ្យ រួមមានអង្ករ ២៥គីឡូក្រាម, តង់ ១, មី ១កេស, ប៊ីចេង ១កញ្ចប់, ទឹកស៊ីអ៊ីវ ១ដប និងត្រីខ ៥កំប៉ុង។

ក្រសួងធនធានទឹក និងឧតុនិយមបានបញ្ជាក់ឲ្យដឹងថា ចាប់ពីថ្ងៃទី០៥ ដល់ថ្ងៃទី១១ ខែតុលា ឆ្នាំ២០២២ ភ្លៀងនឹងបន្តធ្លាក់ពេញមួយផ្ទៃប្រទេសតែម្តង ដោយលាយឡំនឹងផ្គរ រន្ទះ និងខ្យល់កន្ត្រាក់ផងដែរ។

ក្រសួងធនធានទឹក បានអំពាវនាវឲ្យអាជ្ញាធរដែនដី និងប្រជាពលរដ្ឋ បន្តប្រុងប្រយ័ត្នចំពោះបាតុភូតធម្មជាតិ ដែលអាចកើតមានឡើងជាយថាហេតុណាមួយ៕